¿Chayrí?

Kaynatam ñawapaq cartata quillaqayta munarqani

Wiraqucha-hatun tayta Presidente.Ñuqam kani Alfonso Cáñepa, Quinua llanta-markapi wasiyuq Perú suyu runa, chakra runam qamta rimapayamuyki, kay Perú suyupi llapan autoridadkunamanta aswan hatum kamachiqnin Presidente kasqaykirayku. Kaytam nimuyki qillqapi:
Kay wata julio killapa chawpinpim guardiakuna presota hapiwaspa, mana piwan rimanaypaq harkawaspa , mana chaninta ñakarichiwarqan, aychayta rachiykuwarqan, tulluyta pakirkuwarqan , kañarkuwarqan,sipiwarqanku, Chaynata ruwawasqanku hawataqmi chinkarqachiwaranku. Qampas uyarirqankim tukuy Peru suyuntinpi runapa ñuqarayku qaparisqankuta. Kunanqa, ñuqa kikiymi mañakiyki , Limaman apasqanku wakin tulluyta kutichipuwanaykipaq. Qamqa yachankim, llapallan ley qillqakunam kamachin Peru suyupi, tiqsi muyuntinpipas, Derechos Humanos nisqa, runaman sayapakuq kamachiykunam rimachkan, sapanka runa, pipas maypas, kaypipas, hawa llaqtapipas, runa hinapuni kawsakunankupaq. Manam chaypas chayllachu, kikinmanta wañukapuspa , huntasqa cuerpotinta pampapunankupaq. Runa hina kawsaybibta mana pipas sarunanpaq kamachiy hinataqmi kallantaq huk atún kamachiy, llapan runapa huntanan: wañusqa runataqa manpunin rachirqunchu, llupurqunachu, nakarqunachu, pishtaequnachi, imaraykupas. Kay atún kamachiytam huntananpuni tiqsi muyuntinpi , tukuy mundontinpi maqanakuq runa, awqanakuypi, guerrapi kaq runa, piña mayña kaspapas. Wañusqa runapa cuerponqa huntasqapunim kanan. Wañusqa runata rachirquy, nakarquy, llupuquy, pishtarquyqa ancha hatun hucham. Chay mana chanin huchatam rurachkanku kunan pacha kay Perú suyunchikpi, chay nisqay atún kamachiykunata saruykuspa, runa kayninchikta pampaman wischuykuspa, Diospa wawan kasqanchikta qunqaruq tukuspanku; Antropologo nisqa yachaq tukuq runaykikunaqa ninmi: Kaychika sipinakuytam apamun terroristakuna nispa. Manam chaynachu. Qampa kamachisqayki Estadom kay chiqninakuypaq huchayuqqa. Ñuqam kayta nichkayki, manaña imayuq, manaña kawsaq runa, kay chiqninakuypi imaymanata ñakarichispa, rachirquspa , pishtarquspa, nakarquspa sipisqa, kañasqa, chinkachisqa runa. Ñuqam mañakuchkayki, huntasqa cuerpoyta, llapan tulluyta kutichipuway nispay, hina wañuy tukusqatañapas.
Allin rimaypiqa, manam kay qillqaytaqa qawariwaqchu. Huknin ñawpa machuypas, ñuqa hina wawa sunqu upa niraq kayninpim qillqaranña iskay waranqa qawaranku, leeranku, iskay pachak watamantaña.
Cajamarcapi innata sipinankupaq cura Valverdepa rimasqantam ichaqa, Uchuraqaypi periodistakuna sipisqankumanta llulla rimaq qillqatapas, llapallan-lliw yachay wasikunapim warmakunam qawapayanqa, llenqaku, umankuman allinta churanankukama, mana haykaqpas qunqanankupaq , chay qillqap patanpips Estado sayachkanman hinapuni. Amaña astawan suyaspa, kunanpacha pampachiwanaykitam munani.